أنا فديت مالكذب متع برشا عباد
فديت مالكذب متع برشا عباد تعدي النهار وهي تحكيلي على الديمقراطية وإرادة الشعب اللي هي وحدها كفيلة باش تحميها والي هاكا علاش لازم ننتخبوها في المجلس التأسيسي وبعد تعملي ميثاق تسميه جمهوري وما تستفتينيش عليه وتقلي لازمو أقوى من أي وثيقة دستورية
فديت مالكذب متع برشا عباد تعدي النهار وهي تحذر في الشعب التونسي من حركة النهضة على خاترها تستعمل في العنف ونهار اللي حجرو النهضة في المستير قالوا إيه يستاهلو...هاكوما خوانجية
فديت مالكذب متع برشا عباد تعدي النهار تبوستي في حكايات ماء الفرق والقس المذبوح دوب ما تخرج و تشوف عاد السبان والبف طولو ميترو وبعد يخرج التكذيب أما ميشوفوهش و الحكاية بالنسبة ليهم تولي منسية
فديت مالكذب متع برشا عباد تقول لا للنهضة على خاطر تونس لينا الكل و كي يعمل واحد لحية ولا يلبس قميص يلمولو دينار دينار ويحبوا يبعثوه لأفغانستان...ولا للسعودية
فديت مالكذب متع برشا عباد تقول يزينا من حركة النهضة ديما تلعب في دور الضحية، وبعد تمشي الطفلة في المطار تستقبل راشد الغنوشي وتقول ضربوني بكف، وتعملي مسرحية
فديت مالكذب متع برشا عباد تقول ما تحتكرش الحديت عل الإسلام وهي على الحداثة وحقوق المرأة تحب تحكي كان هيا
فديت مالكذب متع عباد تقول النهضة لازم ما تستعملش الدين لأغراض سياسية وبعد تعملي باج فايسبوك و تحطلي فيها فيديو متع شيخ خلواض من إيران ولا من دولة خليجية
فديت مالكذب متع برشا عباد شادة للنهضة حكاية برقية بعثتها لصخر الماطري وهي في التسعينات مدت يدها لبن علي ودخلت في الحكومة وعاونتو باش يضرب الإسلاميين وهو عطاها في مجلس النواب عشرين بالمية
فديت مالكذب متع برشا عباد تقلي النهضة تكفر كل من يخالفها وهوما إلي ما يفكرش كيفهم يولي متخلف متعصب ظلامي، ساعات فاشستي و ساعات يعوم في بحر مالرجعية
فديت مالكذب متع برشا عباد كي تجي تقابل أمير المؤمنين تلبس قشابية أما برا نقولو فنانة وباسم الفن مسموحلها تفبرك قضية
فديت مالكذب متع برشا عباد وما نحبش نفددكم معايا على خاتر الليستة طويلة بل لا نهائية
فديت مالكذب متع برشا عباد و كان حد ما عجبوش كلامي يجم يرد عليا واللي عندو أحسن رد نعطيه هديه، دبوسة ماء ... امبورتي من إيران، وزيد على ذلك مكشتية