ما هياش دار بوك يا سي عياض

·       فرضية:  أنا نبدا المدونة بفرضية بسيطة: أي قرار يهم مصير شعب لازمو يكون قرار شرعي وباش يكون شرعي لازمو شرعية (ساهلة) سواء كانت هذه الشرعية شعبية وإلا دستورية وإلا ثورية وإلا حتى ميتافيزيقية (بدينا في البلادة)...المفيد ثما شرعية

·       سؤال (بسيط أما يطرح نفسه) : شني الشرعية متع المدعو سي عياض بن عاشور شُهِرعظيم السيسكور؟

·       تمشي: نبداو نشوفو في الشرعيات وحدة وحدة واللي ما تخدمش نجربوا غيرها

شرعية لذاته :

 يعني مجرد أنو السيد اسمو عياض وهو ولد بن عاشور يعطيه شرعية قيادة السيسكور و اصدار القوانين وقيادة البلاد إلى حين الانتخابات، وهذا إما لذاته وإما لصفاته (جماله وحسبه ونسبه ودينه)  وإما لتاريخه النضالي (قيل أنو بن علي كان ما يرقدش الليل خوفا من انتقاداته والعهدة على من قال). أنا باش نكون موضوعي نعترف إلي سي عياض ولد عائلة وبوقوس(الباقي العلم عند ربي) أما ظاهرلي الشرعية هذه ماتكفيش للمنصب متاعو.

إذن هات نشوفو إذا كان الشرعية ماتنبعش من ذاته بالكشي جات من غيره

شرعية لاختياره:

ما غير ما نطول عليكم معناها شرعية من انتخاب مباشر أو غير مباشر وإلا مستمدة من شرعية إلي عينوا وأنا نقول الزوز ما عندوش (هو شكون إلي عينوا؟)

وبما أنو أي إنسان عندو منطق يعرف أنو أي شرعية تنضوي تحت التعريفين السابقين نستنتجوا إلى سي عياض فاقد للشرعية كشخص. معناها بصفة أخرى كي يجي في التلفزة زايد يحاول يقنعني إلي قراراته منطقية و يلعبلي عل الوتر الحساس ويجبدلي على الحداثة والتسامح والمرأة...لأنه ببساطة رأيه مايعنينش. ماهو قلنا السيد ماعندوش شرعية. علاش تطويل الهدرة؟

لا شرعية له بل مجرد رئيس لهيأة شرعية

 و كيما قال الراجل : ما يستحقش شرعية، تي إش يعمل بيها؟

هات نطيحو البارة ونشوفو لعله مجرد منسق لهيأة شرعية. كلام صعيب هات نفهموه كلمة كلمة

منسق

هو في الأصل السيد الفاضل ماهوشي مُطالب باش تكون عندو الشرعية فالأصل أنو مجرد منسق لأعمال الهيئة كيما تشوفو رئيس برلمان أي دولة ديمقراطية موش الفاتق الناطق اللي يفرض في رايو على الناس و هاكا علاش نشوفو رؤساء البرلمانات الديمقراطية رغم أنو أصلهم من حزب الأغلبية يحاولو يخليوا نفس المسافة مل الأحزاب الكل (متع ناس كلاس، أما يا ذنوبي...) ويتجنبوا أنهم يعطيوا رايهم خاصة إذا كان فيه نقد لأحد الأطراف خلي على ذلك إذا كان فيه تهديد...(آش مدخل التهديد، سامحوني كي المدونة تطوال نولي نفلطي...)

هيأة شرعية:

في أي دولة ديمقراطية الشرعية مستمدة من الشعب (أجزم اختصارا للنقاش) وتُوكل لأشخاص بعينهم عن طريق الإنتخاب.أما بما أنو في تونس ما عناش وقت لكل هذا (نعملوشي انتخابات باش نحضرو للإنتخابات يا رسول الله؟) لازمنا نحاولو نلقاو صيغة تقربنا من هالشرعية و من بين الطرق أنا نلمو الأحزاب الكل في الهيأة (آش ماش نعملو سينون؟). تباقينا الخطر يكمن في حاجتين: الأحزاب لا تمثل الشعب أو نسبة التمثيل غير متوازنة أي تلقى 10 أحزاب شيوعية (أقصى اليسار) مقابل حزب يميني واحد (على سبيل المثال). ونفس الشيء ينطبق على الجمعيات كيما النساء الديموقراطيات (متقليش شكون ناداهم و علاش، تلقاهم في الهيأة وفي التلفزة وفي القهوة وفي... نسكت خير) والمستقلين كيما سي محرر العقد الجمهوري اللي يعترف بأنه كتب العقد بقصد إحراج طرف معين لتبيان كونه هذا الطرف انسلاخ ديمقراطي (شكون يعرف المصطلح هذا منين جاء؟) و كي نقول أنو ثما مصدري خطر فإني افترضت حسن النية في اختيار أعضاء هذه الهياة وقد يكون هذا الافتراض يعبر عن حسن نية الكاتب أو عن غباؤه (غباء منقطع النظير يقول الأخ إلى بجانبي...).

لا شرعية له بل مجرد رئيس لهيأة غير شرعية

الهيأة غير شرعية ولكن القائل يقول خير من بلاش ما عندناش حل آخر

في هذه الحالة وبعجالة يفترض أمرين في طريقة عمل الهيأة:

الاقتصار على الضروريات والملزمات من القوانين والقرارات والتحضير للانتخابات وانتظار المجلس التأسيسي اللي عندو الشرعية الحقيقية باش هو اللي يحضر الدستور و يتلها بالتطبيع من عدمه ويكتب العقود الجمهورية إلخ...

العمل على تعزيز روح الوفاق والحرص على أخذ القرارات بالإجماع موش قالو تصويت. (و استحلفكم بالله شكون ينجم يفهمني كيفاش يلزمني تصويت ناس أنا ما صوتش عليهم من أصلو...)

خلاصة القول:

أكتفي بوضع فيديو إطلالة سي عياض في قناة نسمة ولكم التعليق أكتفي بالقول : التهديد موش معقول و معندوش مبرر وحتى بالشرعية مرفوض و يعوق إقبال السياح والمستثمرين...

 

ملاحظة :

المدونة عبارة عن رؤوس أقلام تكتفي بالإشارة أو قل التلميح بالفكرة ولم أشأ الخوض في التفاصيل

الناس المعنية بالمدونة هي الناس الموافقة على الفرضية الأولى موش اللي تصفق لبن عاشور لمجرد أنو قراراته تتفق مع رؤاها و مصالحها