استفتاء مشبوه

كي العادة يرقد الواحد ويفيق ويسمع بهدرة جديدة كيما هدرة هل الاستفتاء المشبوه. الاستفتاء –حاشاكم- حكاية ما سمعناش بيها كان توة، شهر قبل الانتخابات وقت اللي هذا لاهي يقدم في المرشحين متاعو. وهذا الاستفتاء تشوف خمسين حزب يتبناوه وقناة متاع باعث القناة تبندرلو وسي الباجي ماشي يعمل خطاب بالك يحكي عليه وهوني تتساءل – ببراءة- ياخي وقتاش ووين تفاهمو، في التلفون ولا تحت الساس ولا بعد صلاة الجمعة ولا بعد سكرة آخر الليل؟ و مايقولولناش أحنا الشعب وما أدراك؟ 

تي اصبر علينا، أهو ريجيم آكسيليري، ونقاشات حامية في القنوات الكل. باهي حل التلفزة. آش تلقى؟ تلقى حظبة متع قدعان دايرين في واحد وحده (معبوكة العادة: راهو حزب واحد خالف نعرف ويحط العصا في العجلة) والمذيع يحز ساعة ساعة أما موش برشا، يخاف على خبزته وثمة باعث قناة وراه.

باهي علاش يحبو استفتاء؟ على خاطر خايفين علينا أحنا الشعب التونسي العظيم من عدم وضوح الرؤية (تقول هلال العيد) و على خاطرنا كي الطفل الصغير كي تعطيه لعبة ينجم يكرسها أول نهار وهوني مشكورين يحاولو يأطرونا وياخذوا بيدينا ويعطيونا الديمقراطية أما بالكنابل أوالتقسيط، أما خير ولا نعملو "كوما" ديمو كراسيك؟

اللعبة هذه هي المجلس التأسيسي، وهوما الحق مل الأول موش عاجبتهم. قالو ستة شهور ونعملو انتخابات رئاسية وواحد منا يشد رئيس، جات القصبة واحد وثنين، تغلبوا على أمرهم، قالو نعملو قانون انتخابي يطلعنا أحنا الصغار، باقي خايفين، قالو نعملو ميثاق أقوى مالدستور نحافظو على الحريات، بالك الشعب يبلبزها ويدخل روحو في حيط، وبعد حسوها رزينة ولا كيفاش، قالو باهي أخف الضررين هات نحدو من صلاحياتو هل المجلس المحنون.

يا بوقلب...خمسين حزب وميتين جمعية وقنوات تلفزية وشخصيات تقول على روحها مستقلة وخايفين؟ اللي يسمعكم تحكيو يقول وحدكم تلموا مائة وخمسين بالمائة وخايفيين؟

ولا زعما تحسابو الطش يوصل كان لبن علي وجماعته وكي شفتو الواد ماش يفيض عليكم و ماش يهزكم وانتوما تفجعتوا؟

وتستشهدولي بمصر والاستفتاءات متاعها، توا تذكرتوها؟ كي شطر الوزرة في الحبس واللي قتلو الشعب حاسبوهم قلتو ما تحبوش مقارنات و كل بلاد وخصوصيتها أما كان توا في الاسفتاء نرجعوا كيف كيف؟

يا بوقلب صليوا على النبي وامشيوا للانتخابات بالك تربحوا؟ ماهو سبقوا الخير... ياخي شعبكم ماشي يطلع كله رجعي ويسلم في ناس "ديمو كراسيين" تقدميين و عسل كيفكم؟

وسامحوني، كي الصلاحيات التنفيذية والتشريعية تنحويها مل المجتمع التأسيسي لشكون تعطيوها؟ لناس تعرفوهم انتوما باهيين موش كي اللي يمكن يطلعهم شعبكم المسكين؟

خايفيين لا المجلس يقورن ويشد عشرين سنة فوق الميتين؟ والمرسوم بتاريخ 3 أوت يقول في أجل أقصاه سنة من تاريخ انتخابه نسيتوه ولا تناسيتوه؟

تخافو ولا ماتخافوش أموركم أما الشعب التونسي ما هواش خايف من صوته ومن انتخاباته وما هواش ناوي يختارلكم سكرتير ولا لجنة خبراء قانون

الشعب التونسي يحب يشوف بعد 23 اكتوبر بلاد جديدة ووجوه جدد وحكومة جديدة ودم جديد يجري في عروق الدولة.

الشعب التونسي يحب يفطر بعد صيام أكثر من خمسين سنة وما يحبش يفطر على بصلة

الشعب التونسي يحب يفرح ما تفسدولوش فرحته

الشعب التونسي يحب حاجة بسيطة، يسترجع السلطة متاعه بكل تفريعاتها و تشعباتها وأشكالها وألوانها، وهكا يسترجع هيبته وكرامته

الشعب التونسي يحب ويعمل اللي يحب،  كرخ من كرخ وأحب من أحب.